Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa ku qaabilay Madaxtooyada Villa Somalia Wasiir Ku-xigeenka Arrimaha Dibadda ee Dowladda Ruushka, ahna Wakiilka Gaarka ah ee Madaxweynaha Ruushka u qaabilsan Bariga Dhexe iyo Afrika, Mikhail L. Bogdanov.
Kulanka ayaa diiradda lagu saaray xoojinta xiriirka diblomaasiyadeed ee u dhexeeya Soomaaliya iyo Ruushka, iyadoo labada dhinacba ay ka wada hadleen muhiimada ay leedahay ballaarinta iskaashiga siyaasadda, ganacsiga iyo amniga.
Madaxweyne Xasan Sheekh Maxamuud ayaa caddeeyay sida ay Soomaaliya uga go’an tahay in ay xoojiso xiriirka kala dhaxeeya Ruushka, isla markaana ay soo dhaweynayso doorka Ruushku uu ka qaadan karo dib-u-dhiska dalka, horumarinta dhaqaalaha, iyo xoojinta amniga.
Dhankiisa, Bogdanov ayaa ku celiyay diyaar-garowga Ruushka ee ah inuu taageero dadaallada Soomaaliya ee ku aaddan nabadeynta, dib-u-habaynta hay’adaha amniga, iyo kobcinta dhaqaalaha.
Intii uu socday kulanka, Bogdanov waxa uu Madaxweynaha u gudbiyay casuumaad rasmi ah oo ka timid Madaxweynaha Ruushka, Vladimir Putin, taas oo ku saabsan ka qeybgalka Shirka Ruushka iyo Jaamacadda Carabta.
Shirkan ayaa diiradda lagu saari doonaa arrimaha gobolka iyo xoojinta xiriirka Ruushka iyo waddamada Carabta.
Madaxweyne Xasan Sheekh ayaa uga mahadceliyay Madaxweynaha Ruushka casuumaadda, wuxuuna muujiyay in uu ka qeyb gali doono shirkaasi lagu falan qeyn doono nabadda, amniga, iyo horumarka gobolka.
Sidoo kale, labada dhinac ayaa ka wada hadlay xaaladda guud ee gobolka, dadaallada nabad-dhisidda, iskaashiga la dagaalanka argagixisada, iyo muhiimada ilaalinta sharciga caalamiga ah iyo ixtiraamka madaxbannaanida dowladaha.
Kulankan ayaa muujinaya dadaallada lagu xoojinayo xiriirka taariikhiga ah ee ka dhexeeya Soomaaliya iyo Ruushka, waxaana la filayaa inuu horseedo iskaashi cusub iyo fursado hor leh oo labada dal ay ka faa’iidi karaan.
