Muqdisho, Soomaaliya – Wasiirka Arrimaha Dibadda ee Xukuumadda Federaalka Soomaaliya, Axmed Macallin Fiqi, ayaa si kulul u weeraray siihayaha Madaxa Howlgalka Midowga Afrika ee Soomaaliya (AUSSOM), Danjire Sivuyile Thandikhaya Bam, isagoo ku eedeeyay inuu taageero u yahay kooxda argagixisada ah ee Al-Shabaab.
Wasiir Fiqi ayaa sheegay in Danjire Bam – oo u dhashay dalka Koonfur Afrika isla markaana ah ku xigeenka iyo ku simaha Ergeyga Gaarka ah ee Midowga Afrika ee Soomaaliya – uu warbixinno marin habaabin ah u gudbiyay beesha caalamka, gaar ahaan Golaha Ammaanka ee Qaramada Midoobay, kuwaasoo uu ku muujinayo in Al-Shabaab yihiin koox doonaysa dowladnimo isla markaana ay joojiyeen falalkii argagixisanimo ee lagu yaqiin.
“Siihayaha AUSSOM muddo dheer ayaa si hoose loogu tuhmayay arrimahan, balse hadda ma uusan qarsoomin. Wuxuu noqday taageere Al-Shabaab, wuxuuna caddeeyay inuu neceb yahay horumarka Soomaaliya,” ayuu yiri Wasiir Fiqi.
Wasiirka ayaa sidoo kale xusay in eedeymaha hadda soo baxay ay salka ku hayaan tuhun hore oo muddo laga hayay Danjiraha, isla markaana hadda ay dowladda Soomaaliya qaadi doonto tallaabo adag oo uu kamid noqon karo in dalka laga saaro.
Ilo xog-ogaal u ah Wasaaradda Arrimaha Dibadda ayaa sheegay in Dowladda Federaalka Soomaaliya ay wado qorshe lagu masaafurinayo Danjire Sivuyile Thandikhaya Bam, taasoo ka dhalatay sida ay dowladda u aragto inuu si cad uga hor imanayo danaha qaranka Soomaaliyeed.
Tallaabadan ayaa ah mid sare u sii qaadaysa xiisadda u dhexeysa Dowladda Soomaaliya iyo Midowga Afrika, gaar ahaan howlgalka AUSSOM, oo ah mid la filayay inuu beddelo AMISOM isla markaana taageero siiyo Soomaaliya xilligan kala guurka amniga.
