Ciidan ka tirsan Daraawiishta Puntland oo ku sugan buuraha silsiladda Golis ee gobolka Baru ayaa maanta sheegay in ay ka gadoodsan yihiin mushaar la’aan ku dhacday.
Muuqaal lagu faafiyay baraha bulshada ayaa muujinaya askar ka tirsan ciidamada ku sugan buuraha Golis oo ka cabanaya mushaar la’aan islamarkaana sheegaya in ay gadoodsan yihiin.
Sarkaal ka hadlaya muuqaalka ayaa sheegaya in ciidanka gadoodsan yihiin ururka 7-aad ee ciidamada Daraawiishta ee ku sugan silsiladda Golis isaga oo madaxda dowladda ka codsaday in ciidanka la siiyo xuquuqdooda.
“Waxaanu nahay ururka 7-aad ee ciidanka Daraawiishta Puntland oo ku sugan buuraha silsilada Golis waxan doonaynaa in aan ogaysiino mas’uuliyiinta dowladda in aanan helin xuquuqdii aan lahayn annaga oo ku jirna difaaca dalka” ayuu yiri sarkaalka muuqaalka ka hadlaya.
Gadoodka ciidamada kala duwan ee ka cabanaya mushaar la’aanta ayaa muddooyinkii danbe ku soo noq-noqday degaannada Puntland kuwaas oo qaarkood meelo xirteen inkastoo markii danbe laga qaaday.
PUNTLAND POST
